دیہی خواتین کو بااختیار بنانا قومی خوشحالی کیلئے ناگزیر ہے: ایاز صادق

اسلام آباد: اسپیکر قومی اسمبلی سردار ایاز صادق نے پاکستان کی زرعی ترقی، غذائی تحفظ اور سماجی و اقتصادی پیش رفت میں دیہی خواتین کی گراں قدر خدمات کو خراج تحسین پیش کرتے ہوئے کہا ہے کہ انہیں بااختیار بنانا پائیدار ترقی اور قومی خوشحالی کے لیے ناگزیر ہے۔ہر سال 15 اکتوبر کو منائے جانے والے **دیہی خواتین کے عالمی دن کے موقع پر اپنے پیغام میں اسپیکر قومی اسمبلی نے کہا کہ دیہی خواتین زراعت، مویشی بانی، گھریلو معیشت اور مقامی آبادیوں کی ترقی میں اہم کردار ادا کر رہی ہیں۔ ان کی خدمات نہ صرف دیہی معیشت کو سہارا دیتی ہیں بلکہ ملکی اقتصادی ترقی میں بھی نمایاں حصہ ڈالتی ہیں۔سردار ایاز صادق نے کہا کہ دیہی خواتین کو آج بھی معیاری تعلیم، صحت کی سہولیات، مالی وسائل اور پائیدار معاشی مواقع تک رسائی میں متعدد مشکلات کا سامنا ہے۔ ان رکاوٹوں کا خاتمہ جامع ترقی، سماجی انصاف اور مساوی قومی ترقی یقینی بنانے کے لیے ضروری ہے۔انہوں نے دیہی خواتین کے لیے تعلیم، صحت، فنی و پیشہ ورانہ تربیت، مالیاتی خدمات اور جدید زرعی ٹیکنالوجی تک رسائی بہتر بنانے کے لیے مربوط اقدامات پر زور دیا۔اسپیکر قومی اسمبلی نے کہا کہ خواتین کے قانونی، جائیداد اور وراثتی حقوق کا تحفظ یقینی بنانے کے ساتھ انہیں مقامی اور قومی سطح پر فیصلہ سازی کے عمل میں مؤثر نمائندگی اور شرکت کے مواقع فراہم کیے جانے چاہئیں۔انہوں نے صنفی مساوات کے فروغ میں پارلیمان کے کردار کو اجاگر کرتے ہوئے کہا کہ خواتین کے حقوق کے تحفظ اور انہیں سماجی و معاشی طور پر بااختیار بنانے کے لیے مؤثر قانون سازی اور مضبوط پارلیمانی نگرانی انتہائی اہم ہے۔سردار ایاز صادق نے متعلقہ سرکاری اداروں، پالیسی سازوں اور دیگر شراکت داروں پر زور دیا کہ وہ دیہی خواتین کے سماجی و اقتصادی حالات بہتر بنانے کے لیے مشترکہ کوششیں کریں اور انہیں وہ وسائل، مواقع اور مقام فراہم کریں جس کی وہ مستحق ہیں۔انہوں نے کہا کہ دیہی خواتین کی خدمات کا اعتراف اور ان کی صلاحیتوں میں سرمایہ کاری غربت میں کمی، زرعی ترقی اور خوشحال پاکستان کی تعمیر کے لیے کلیدی اہمیت رکھتی ہے۔اسپیکر قومی اسمبلی کے مطابق دیہی خواتین کو بااختیار بنانے سے نہ صرف ان کا معیارِ زندگی بہتر ہوگا بلکہ دیہی آبادی مضبوط ہوگی، غذائی تحفظ میں اضافہ ہوگا اور ملک کی طویل المدتی پائیدار ترقی کو بھی تقویت ملے گی۔