امریکا کا ایران سے جوہری پروگرام پر مزید لچک کا مطالبہ

واشنگٹن: امریکی نائب صدر جے ڈی وینس نے کہا ہے کہ امریکا ایران کے ساتھ معاہدہ کرنے کے لیے تیار ہے، تاہم تہران کو اپنے جوہری پروگرام کے معاملے پر مزید لچک کا مظاہرہ کرتے ہوئے یورینیم افزودگی کی صلاحیت محدود کرنا ہوگی۔جے ڈی وینس نے کہا کہ ایران کی جانب سے محض یقین دہانیاں امریکی تحفظات دور کرنے کے لیے کافی نہیں ہوں گی۔ انہوں نے سوال اٹھایا کہ اگر ایران کا جوہری ہتھیار بنانے کا کوئی ارادہ نہیں تو اسے 60 فیصد تک افزودہ یورینیم برقرار رکھنے کی ضرورت کیوں ہے۔امریکی نائب صدر نے بتایا کہ امریکا ایران کے صدر اور وزیر خارجہ کے ساتھ مذاکرات میں مصروف ہے، تاہم آیت اللہ علی خامنہ ای کی مبینہ ہلاکت کے بعد تہران میں حتمی فیصلے کا اختیار کس کے پاس ہے، اس بارے میں غیر یقینی صورتحال موجود ہے۔وینس نے مزید کہا کہ ایران نے آبنائے ہرمز میں تجارتی بحری جہازوں کو وقفے وقفے سے نشانہ بنایا، تاہم وہ توانائی کی برآمدات روکنے میں ناکام رہا۔ ان کا کہنا تھا کہ ایران کے ساتھ جاری تنازع کے باوجود امریکا کو ہتھیاروں کی قلت کا سامنا نہیں ہے۔امریکی نائب صدر کے بیانات سے ظاہر ہوتا ہے کہ واشنگٹن جوہری تنازع اور دونوں ممالک کے درمیان وسیع تر کشیدگی کو کم کرنے کے لیے ایران سے اس کے جوہری پروگرام پر مزید لچک کا مطالبہ کر رہا ہے۔