فیول ریلیف اسکیم کا ملک گیر آغاز 16 ستمبر سے، رجسٹریشن آسان بنانے کی ہدایت
وزیراعظم کی جانب سے اعلان کردہ فیول ریلیف اسکیم کا ملک بھر میں آغاز 16 ستمبر 2026 کو رات 11 بج کر 59 منٹ** پر ہوگا، جبکہ اسلام آباد میں اسکیم پہلے ہی فعال کردی گئی ہے۔نائب وزیراعظم و وزیر خارجہ اسحاق ڈار کی زیرصدارت وزیراعظم فیول ریلیف اسکیم کے انتظامی امور اور عملدرآمد سے متعلق اجلاس ہوا، جس میں وزیر اطلاعات و نشریات، وزیر آئی ٹی، وزیر پارلیمانی امور، وزیر مملکت برائے خزانہ، وزیراعظم کے معاون خصوصی، سیکریٹری آئی ٹی اور اسلام آباد سے تعلق رکھنے والے ارکان قومی اسمبلی نے شرکت کی۔اجلاس میں اسحاق ڈار نے ہدایت کی کہ فیول ریلیف اسکیم کے لیے رجسٹریشن کا عمل آسان اور ہر شہری کے لیے قابل رسائی بنایا جائے تاکہ زیادہ سے زیادہ مستحق افراد اس سہولت سے فائدہ اٹھا سکیں۔نائب وزیراعظم نے متعلقہ حکام کو اسکیم کے حوالے سے عوامی آگاہی مؤثر بنانے اور پیٹرول پمپس پر اس کے ہموار اور مؤثر نفاذ کو یقینی بنانے کی ہدایت بھی کی۔انہوں نے منتخب نمائندوں پر زور دیا کہ وہ فیول ریلیف اسکیم سے متعلق معلومات عوام تک پہنچائیں اور شہریوں کو رجسٹریشن کے عمل میں معاونت فراہم کریں۔اسحاق ڈار نے وزیراعظم یوتھ پروگرام کے رضاکاروں کو بھی عوامی آگاہی اور رجسٹریشن کے لیے متحرک کرنے کی ہدایت کی۔اجلاس کو بتایا گیا کہ وزیراعظم فیول ریلیف اسکیم اسلام آباد میں فعال ہے، جبکہ ملک کے دیگر حصوں میں اس کا آغاز 16 ستمبر 2026 کو رات 11 بج کر 59 منٹ پر کردیا جائے گا۔
