غزہ جنگ بندی کے باوجود اسرائیل پیچھے نہیں ہٹے گا، نیتن یاہو

اسرائیلی وزیراعظم بنیامین نیتن یاہو نے غزہ میں فوجی پوزیشنز کے دورے کے دوران کہا ہے کہ جنگ بندی کے باوجود اسرائیلی فوج موجودہ لائن سے پیچھے نہیں ہٹے گی اور حماس کو غیر مسلح کرنے تک کارروائیاں جاری رکھی جائیں گی۔اسرائیلی میڈیا کے مطابق نیتن یاہو کے ہمراہ چیف آف اسٹاف ایال زامیر، سدرن کمانڈ کے سربراہ میجر جنرل یانیو عشور اور ڈویژن 99 کے کمانڈر بریگیڈیئر جنرل ایلیڈ تزوری بھی موجود تھے۔یلو لائن کے قریب گفتگو کرتے ہوئے نیتن یاہو نے کہا کہ اسرائیلی فوج اس وقت غزہ کی تقریباً 60 فیصد پٹی کو کنٹرول کر رہی ہے اور موجودہ لائن سے پیچھے ہٹنے کا کوئی ارادہ نہیں۔ ان کے بقول اسرائیلی فوج اسی پوزیشن پر موجود رہے گی۔نیتن یاہو نے حماس کا نام لیے بغیر کہا کہ غزہ میں اسرائیل کی گرفت مزید مضبوط ہوگی، کیونکہ اسرائیلی فوج ان جنگجوؤں کے خلاف کارروائیاں کر رہی ہے جو اسرائیل کے لیے مسلسل خطرہ ہیں۔ انہوں نے کہا کہ ایسی کارروائیاں بار بار کی جا رہی ہیں۔اسرائیلی وزیراعظم نے ایک روز قبل کی کارروائی کا بھی حوالہ دیا، جس میں اسرائیلی فوج کے مطابق حماس کے داخلی سیکیورٹی نظام کے سربراہ کو گرفتار کیا گیا تھا۔ نیتن یاہو نے کہا کہ اس گرفتاری سے اسرائیل کو اہم معلومات حاصل ہوں گی۔انہوں نے واضح کیا کہ اسرائیل کی بنیادی جنگی ترجیحات میں کوئی تبدیلی نہیں آئی۔ ان کے مطابق حماس کو غیر مسلح کرنا اور غزہ کو غیر فوجی بنانا اسرائیل کے بنیادی اہداف ہیں اور ان کے حصول کے لیے ہر ممکن کوشش کی جا رہی ہے۔نیتن یاہو نے دعویٰ کیا کہ غزہ اب اسرائیل کے لیے پہلے جیسا خطرہ نہیں رہے گا اور یہ ہدف بڑی حد تک حاصل کیا جاچکا ہے، تاہم انہوں نے کہا کہ ابھی مزید کام باقی ہے جسے جلد مکمل کیا جائے گا۔یہ بیان ایسے وقت میں سامنے آیا ہے جب غزہ میں جنگ بندی کے تحت اسرائیلی فوج اور حماس کے زیرِ اثر علاقوں کے درمیان ’یلو لائن‘ قائم ہے۔ جنگ بندی کے بعد اسرائیلی فوج کے زیرِ کنٹرول علاقے کو اسی لائن کے ذریعے حماس کے زیرِ اثر علاقے سے الگ کیا گیا تھا۔یاد رہے کہ مئی 2026 میں نیتن یاہو نے اسرائیلی فوج کو غزہ کے مزید علاقوں پر قبضہ کرنے کی ہدایت دی تھی۔ اس کے بعد اسرائیلی فوج کی جانب سے یلو لائن کے آگے اپنی موجودگی بڑھانے کی رپورٹس بھی سامنے آتی رہی ہیں۔