پی ٹی آئی آزاد کشمیر کا اہم اجلاس ملتوی، 27 ستمبر کے احتجاج پر حتمی فیصلہ بھی مؤخر
میرپور: پاکستان تحریک انصاف آزاد کشمیر کی گورننگ باڈی کا 16 ستمبر کو میرپور میں ہونے والا اہم اجلاس ملتوی کردیا گیا، جس کے باعث 27 ستمبر 2026 کے احتجاج اور لانگ مارچ میں پارٹی کی شرکت سمیت آئندہ سیاسی و تنظیمی لائحہ عمل سے متعلق حتمی فیصلے بھی مؤخر ہوگئے۔سیکرٹری جنرل و سیکرٹری پارلیمانی امور پی ٹی آئی آزاد کشمیر میر عتیق الرحمن کی جانب سے جاری سرکلر میں اجلاس ملتوی کرنے کی وجہ پارٹی کے صدر سردار عبدالقیوم خان نیازی کی مصروفیات بیان کی گئی ہے۔ذرائع کے مطابق اجلاس میں آزاد کشمیر کی موجودہ تنظیمی و سیاسی صورتحال کے علاوہ 27 ستمبر کو ہونے والے احتجاج میں پی ٹی آئی آزاد کشمیر کی ممکنہ شرکت کے حوالے سے حکمت عملی طے کی جانی تھی۔پارٹی ذرائع کا کہنا ہے کہ مرکزی سطح پر جاری احتجاجی سرگرمیوں کے تناظر میں اجلاس کے دوران کارکنوں کو متحرک کرنے، تنظیمی ذمہ داریوں کی تقسیم اور احتجاجی پروگرام سے متعلق مختلف امور پر مشاورت متوقع تھی۔اجلاس ملتوی ہونے کے باعث ان معاملات پر حتمی فیصلہ بھی مؤخر ہوگیا ہے۔ تاہم گورننگ باڈی کے اجلاس کی نئی تاریخ کا فی الحال اعلان نہیں کیا گیا۔پارٹی ذرائع کے مطابق صدر پی ٹی آئی آزاد کشمیر سردار عبدالقیوم خان نیازی کی نجی مصروفیات کے باعث اجلاس ملتوی کرنے کا فیصلہ کیا گیا۔ نئی تاریخ مقرر ہونے کے بعد گورننگ باڈی کا اجلاس دوبارہ طلب کیا جائے گا۔نئے اجلاس میں 27 ستمبر کے احتجاج سمیت دیگر اہم سیاسی اور تنظیمی معاملات پر غور کیا جائے گا، جبکہ پارٹی کی جانب سے آئندہ کے لائحہ عمل کا اعلان بھی نئی مشاورت کے بعد متوقع ہے۔پی ٹی آئی آزاد کشمیر کا یہ اجلاس اس لیے اہم قرار دیا جا رہا تھا کہ 27 ستمبر کے احتجاج میں پارٹی کی ممکنہ شرکت کے حوالے سے تنظیمی قیادت اور کارکنوں کی پالیسی واضح ہونے کی توقع تھی۔واضح رہے کہ اجلاس ملتوی کرنے کے حوالے سے پارٹی کے جاری کردہ سرکلر میں صدر پی ٹی آئی آزاد کشمیر کی مصروفیات کو وجہ قرار دیا گیا ہے، جبکہ 27 ستمبر کے احتجاج میں شرکت سے متعلق حتمی فیصلے کے لیے نئی تاریخ پر ہونے والے اجلاس کا انتظار کیا جا رہا ہے۔
