برطانیہ: دورانِ ڈیوٹی حادثے میں جان گنوانے والے 24 سالہ پولیس افسر فیضان نجیب کی یاد میں تقریب

نارتھمپٹنشائر: دورانِ ڈیوٹی ٹریفک حادثے میں جان گنوانے والے پولیس کانسٹیبل فیضان نجیب کو ان کی پہلی برسی کے موقع پر نیشنل پولیس میموریل ڈے کی تقریب میں یاد کیا گیا۔ 27 ستمبر 2026 کو بیلفاسٹ میں ہونے والی تقریب میں ان کے بھائی اور بہن نے خاندان کی نمائندگی کی، جبکہ ان کی یاد میں تیار کی گئی تصاویر اور ساتھیوں کے پیغامات پر مشتمل کتاب اہلِ خانہ کو پیش کی گئی۔ فیضان نجیب 19 ستمبر 2025 کی رات راؤنڈز کی اسٹیشن روڈ پر پیش آنے والے ایک ٹریفک حادثے پر کارروائی کے لیے جا رہے تھے کہ ان کی گاڑی ایک نیلی وی ڈبلیو پولو سے ٹکرا گئی۔ شدید زخمی حالت میں انھیں کیمبرج کے ایڈن بروکس ہسپتال منتقل کیا گیا، جہاں وہ ایک ہفتے بعد 26 ستمبر 2025 کو انتقال کر گئے۔ ان کی عمر 24 برس تھی۔ فیضان نے 2021 میں بیڈفورڈشائر پولیس سے اپنے کیریئر کا آغاز کیا تھا۔ مئی 2022 میں وہ نارتھمپٹنشائر پولیس میں شامل ہوئے اور ویلنگبورو کی ریسپانس ٹیم میں خدمات انجام دیتے رہے۔ ساتھی انھیں خوش مزاج اور دوسروں کی مدد کے لیے ہمیشہ تیار رہنے والے نوجوان کے طور پر یاد کرتے ہیں۔ پولیس نے ان کی یاد میں ان کا کالر نمبر P1967 مستقل طور پر استعمال سے ہٹانے کا اعلان کیا تھا۔ نارتھمپٹنشائر پولیس کے مطابق فیضان کی یاد میں ہونے والی حالیہ تقریب، ان کی پہلی برسی کے چند روز بعد منعقد ہوئی۔