ہر مرد کی 4 شادیاں کروانا میرا مشن ہے‘، مفتی طارق مسعود کے وائرل بیان پر شوبز شخصیات برہم

کراچی: معروف مذہبی اسکالر مفتی طارق مسعود کے شادیوں سے متعلق ایک وائرل بیان نے سوشل میڈیا پر نئی بحث چھیڑ دی، جس پر پاکستانی شوبز شخصیات اور سوشل میڈیا صارفین کی جانب سے شدید ردعمل سامنے آ رہا ہے۔سوشل میڈیا پر گردش کرنے والی ایک ویڈیو میں مفتی طارق مسعود مردوں کی چار شادیوں کی حوصلہ افزائی کرتے دکھائی دیتے ہیں۔ وائرل کلپ میں ان سے منسوب بیان ’ہر مرد کی چار شادیاں کروانا میرا مشن ہے‘ بھی خاصی توجہ حاصل کر رہا ہے۔ویڈیو کلپ کے بعض دیگر ریمارکس، خصوصاً کم عمر لڑکیوں سے متعلق گفتگو، پر بھی سوشل میڈیا صارفین کی جانب سے شدید تشویش اور تنقید کا اظہار کیا جا رہا ہے۔پاکستانی اداکارہ اور سماجی کارکن نادیہ جمیل نے ڈیجیٹل کریئیٹر اریج جمیل کی جانب سے شیئر کی گئی ویڈیو کو اپنی انسٹاگرام اسٹوری پر دوبارہ شیئر کرتے ہوئے مفتی طارق مسعود کے بیان پر سخت ردعمل کا اظہار کیا۔نادیہ جمیل نے کہا کہ ایسے معاشرے میں جہاں خواتین کو تشدد، جنسی زیادتی اور قتل جیسے سنگین مسائل کا سامنا ہے، اس نوعیت کی گفتگو کو انتہائی خطرناک سمجھا جانا چاہیے۔اداکارہ کے مطابق خواتین کے خلاف نفرت یا امتیازی رویوں کو تقویت دینے والی گفتگو معاشرے میں پہلے سے موجود مسائل کو مزید سنگین بنا سکتی ہے۔مفتی طارق مسعود کے وائرل کلپ پر اداکارہ عائشہ عمر، متھیرا اور ژالے سرحدی سمیت متعدد شوبز شخصیات اور سوشل میڈیا صارفین نے بھی غم و غصے اور تشویش کا اظہار کیا۔بعض صارفین نے وائرل بیان پر قانونی اور متعلقہ اداروں کی جانب سے کارروائی کا مطالبہ بھی کیا، جبکہ دیگر نے خواتین کے حقوق، شادی اور خاندانی معاملات سے متعلق ایسے بیانات پر سنجیدہ بحث کی ضرورت پر زور دیا۔وائرل ویڈیو کے بعد سوشل میڈیا پر دو مختلف آرا سامنے آ رہی ہیں۔ بعض صارفین نے بیان کو مذہبی نقطۂ نظر سے دیکھا، جبکہ کئی صارفین نے گفتگو کے انداز اور خصوصاً کم عمر لڑکیوں سے متعلق ریمارکس پر اعتراض اٹھایا۔دوسری جانب، ناقدین کا کہنا ہے کہ مذہبی یا سماجی معاملات پر گفتگو کرتے ہوئے الفاظ کے انتخاب اور ان کے ممکنہ معاشرتی اثرات کو نظر انداز نہیں کیا جانا چاہیے۔وائرل ویڈیو کے مکمل سیاق و سباق اور بیان کی اصل تفصیلات کی آزادانہ طور پر تصدیق ضروری ہے، تاہم مختصر کلپ نے سوشل میڈیا پر ایک بڑی بحث ضرور چھیڑ دی ہے۔