آزاد کشمیر میں حکومت سازی:بیرسٹر افتخار گیلانی وزیراعظم آزاد کشمیر نامزد

مظفرآباد (نمائندہ خصوصی) آزاد کشمیر میں نئی حکومت کی تشکیل کے حوالے سے اہم مشاورت مکمل کرلی گئی ہے، جبکہ مسلم لیگ (ن) کی قیادت نے ٹیکنوکریٹ نشست سے نومنتخب رکن اسمبلی بیرسٹر افتخار گیلانی کو وزیراعظم آزاد کشمیر کے منصب کے لیے نامزد کرنے کا فیصلہ کرلیا ہے۔ آزاد کشمیر قانون ساز اسمبلی میں وزیراعظم کا انتخاب 28 اگست کو ہوگا۔ذرائع کے مطابق وزیراعظم پاکستان میاں محمد شہباز شریف کی زیر صدارت وزیراعظم ہاؤس میں آزاد کشمیر میں حکومت سازی کے حوالے سے اہم اجلاس ہوا، جس میں آزاد کشمیر کی آئندہ سیاسی و پارلیمانی حکمت عملی سمیت حکومت کے قیام سے متعلق مختلف امور پر تفصیلی مشاورت کی گئی۔اجلاس میں سینیٹر رانا ثناء اللہ، سابق وفاقی وزیر خواجہ سعد رفیق، صدر مسلم لیگ (ن) آزاد کشمیر شاہ غلام قادر، سابق وزیراعظم آزاد کشمیر راجہ فاروق حیدر، نومنتخب اسپیکر آزاد کشمیر قانون ساز اسمبلی چوہدری طارق فاروق اور ڈپٹی اسپیکر احمد رضا قادری نے شرکت کی۔ ٹیکنوکریٹ نشست سے منتخب ہونے والے بیرسٹر افتخار گیلانی بھی اجلاس میں موجود تھے۔اجلاس کے دوران آزاد کشمیر میں مسلم لیگ (ن) کی نئی حکومت کے قیام، آئندہ کی پارلیمانی حکمت عملی اور قانون ساز اسمبلی میں حکومتی امور کو مؤثر انداز میں آگے بڑھانے سے متعلق تفصیلی غور کیا گیا۔ ذرائع کا کہنا ہے کہ مشاورت کے بعد بیرسٹر افتخار گیلانی کا نام وزیراعظم آزاد کشمیر کے لیے فائنل کرلیا گیا ہے۔ذرائع کے مطابق اجلاس میں نئی کابینہ کی تشکیل، مختلف محکموں کی ذمہ داریوں اور حکومت کی آئندہ ترجیحات پر بھی تبادلہ خیال کیا گیا۔ اس موقع پر اس امر پر زور دیا گیا کہ نئی حکومت عوامی مسائل کے حل، انتظامی معاملات میں بہتری، شفاف طرز حکمرانی اور گڈ گورننس کو اپنی ترجیحات میں شامل کرے۔اجلاس میں آزاد کشمیر میں حکومتی امور کو مزید مؤثر بنانے، انتظامی نظام میں بہتری لانے اور عوام کو ریلیف فراہم کرنے کے لیے اقدامات پر بھی غور کیا گیا۔ مسلم لیگ (ن) کی قیادت نے نئی حکومت کے قیام کے بعد پارلیمانی اور انتظامی سطح پر مربوط حکمت عملی اختیار کرنے پر بھی مشاورت کی۔ذرائع کے مطابق وزیراعظم پاکستان کی زیر صدارت ہونے والے اجلاس میں حکومت سازی کے آئندہ لائحہ عمل کو حتمی شکل دینے سمیت آزاد کشمیر قانون ساز اسمبلی میں وزیراعظم کے انتخاب اور اس کے بعد کابینہ کی تشکیل کے معاملات کا بھی جائزہ لیا گیا۔واضح رہے کہ آزاد کشمیر قانون ساز اسمبلی میں وزیراعظم کا انتخاب 28 اگست کو متوقع ہے، جس کے لیے مسلم لیگ (ن) کی قیادت کی جانب سے بیرسٹر افتخار گیلانی کو امیدوار بنانے کا فیصلہ نئی حکومت کی تشکیل کے سلسلے میں اہم پیش رفت قرار دیا جارہا ہے۔اجلاس کے بعد مسلم لیگ (ن) آزاد کشمیر میں حکومت سازی کے حوالے سے سیاسی سرگرمیاں مزید تیز ہوگئی ہیں، جبکہ نئی حکومت کے قیام کے بعد کابینہ کی تشکیل اور حکومتی ترجیحات کے اعلان کو آئندہ کے اہم مراحل میں شمار کیا جارہا ہے۔